歌手許靖韻（Angela）和香港跳遠運動員陳銘泰一同接受新城廣播黎莉主持的特備環節《勁爆樂勢力之我們的驕傲》訪問，分享追夢過程中的挫折和壓力。入行超過10年的Angela，自爆推出首張大碟便天真的以為自己一定會紅，奈何事與願違，令她深受打擊；而陳銘泰直言做運動員都會有孤單的時候，並認為努力和成績不是對等。
Angela於2010年參加英皇新秀歌唱大賽進入三強，2013年正式簽約英皇娛樂，而陳銘泰則於2012年代表香港出賽，雙方多年來各自在崗位上發奮圖強，亦經歷不少難忘事。Angela娓娓道來，「我初出道時覺得自己好好彩，當時比較天真，覺得做歌手一出碟一定會紅，點知冇人識；嗰時公司對我有信心，我自己都有信心，但娛樂圈唔係我好努力就有相等嘅回報，好多時都係睇天時地利人和，嗰時受到好大打擊，認清咗呢個現實。」
由於當時剛升讀大學，Angela計劃畢業後才考慮事業，「畢業之後我好糾結，喺到諗繼續做歌手，定係做番份正職，唔好發明星夢，最後決定喺28歲之前全力去做歌手，同時開咗個網上頻道，由於當時冇人識，所以做幾份工去教琴同補習，維持自己嘅興趣，講得偉大啲係維持自己嘅夢想。」
至於陳銘泰運動員生涯之路亦時有起伏，他在2013年首次打破香港紀錄，順利進入香港體育學院全職訓練，也是他入讀大學的第一年，到大學三年級的時候，他面臨人生交叉點，要在全職運動員和打工仔之間作出決擇，「當時我有諗過，畢業後搵工作會有多少人工？學院資助又有幾多？計咗好多數，但最後發現自己鍾意就繼續去做，因為人生都計唔到咁多，你唔會知道你五年或一年後自己會喺邊，所以就義無反顧去衝。」
早年陳銘泰赴法國跟隨新教練訓練尋求突破，在巴黎的那段日子，陳銘泰在家人和朋友的支持下，第一年已經成功跳出8米成績，令他信心大增，惟孤苦伶仃的生活卻令他苦惱，「我去巴黎時法文都唔識多句，每日訓練四、五個鐘，有廿個鐘係對住四面牆，要長期開住香港收音機，令自己冇咁孤獨感，有時冇一個好嘅突破，壓力就更加大，正如Angela所講，成績同努力唔係對等嘅。」