冼靖峰(Archie)、關楓馨(Fabi) 今日接受新城知訊台薛家燕、范振鋒、思敏主持「開心大派對」節目訪問，MBO TV同步直播。家燕姐最近與Archie、Fabi一同主持電視煮食競賽節目「家常便飯爭霸戰」，家燕姐大讚跟兩位好有默契，坦言初初Archie好有隔膜，因他擔心家燕姐是否可以講笑？家燕姐為令Archie放下戒心，不時特登搵他來搞笑，大讚Archie：「但他好受落，又快接到位，好醒目！永遠講嘢唔會講晒，總是會留番啲俾前輩講，好尊重前輩。」
家燕姐更讚Archie練到好大隻手瓜起𦟌，好奇問他平時食乜？Archie大方即答：「平時只吃白烚雞胸肉、白烚西蘭花、白烚紅籮筐，再攪爛變成汁。」家燕姐很佩服Archie的堅持及毅力，更對Archie的一句話感到佩服：「我見佢日日食雞胸肉蔬菜汁，問佢唔悶咩？跟著佢答『只係飲10年啫！』。」家燕姐及思敏笑曬要求Archie即場騷麒麟臂，阿范在旁笑謂：「依家做男藝人好慘！」
而家燕姐對關楓馨別名叫「Fabi」感到好奇，問她點解叫「Fabi」? 她即解釋：「爸爸媽媽改我英文名叫Fabienne，比較難讀，『Fabi』係簡稱。」家燕姐即笑言：「我英文名叫『Nancy』，因為驚大家覺得難讀，簡稱叫我做「𡃁 (Nan) ！」Fabi與眾人笑到捧腹！
