近幾年一直忙於影視工作的歌影視三棲藝人林峯今年將全力瞓身音樂方面，新一年推出新歌《無傷大雅》，由徐浩監製、吳林峰作曲、林寶填詞。為宣傳新歌，林峯日前現身新城廣播，擔任星級嘉賓接受知訊台台長程凱欣主持的《原來生活好快樂》錄音訪問。問到幾耐無來電台？林峯笑言：「好耐，耐到我都唔記得咗。不過我覺得好親切，但冷氣好凍。哈哈！」程凱欣即提他已有6年，林峯即笑曬說：「有咁耐咩！」
原本錄新歌好緊張
對於時隔多年再出新歌，林峯在訪問中透露唱片公司華納不停為他的新歌搵合作，「徐浩好好，令到我在錄音室好舒服。原本都好緊張，驚carry唔到首歌，但演戲絕對可以幫到唱歌，表達能力比較容易啲，快啲入狀態。」
今次新歌組合十分新鮮，而提到作曲的吳林峰，林峯笑指：「對方當初第一句就是問我，知不知他以前不鍾意我？我話唔洗問，我哋同名，佢實俾同學玩咗好多年。亦因為咁，佢話留意我嘅歌好多年，好了解我的聲線。」
鍾情紅館 每次綵排愛躺在地板望上去
繼2016年，舉辦了第五個個人演唱會的林峯坦言鍾意舞台，「我覺得香港藝人好犀利，唔止表演，仲飛天遁地好勁。」以往都在紅館舉行演唱會，談到啟德體育園將啟用，主場館可容納5萬人，林峯直指始終鍾情紅館，「睇過好多四面台場地，始終覺得紅館好有凝聚力，每一次在紅館綵排，都鍾意瞓喺紅館地板上面，望上去，就算未有觀眾入場都感受到力量
在訪問中，林峯大爆與唱片公司正在聊年底會否開演唱會，所以現在會多收一點歌，「希望計劃2、3個月再出一首新歌，但都會兼顧影視上面，好似電影拍攝。不過後半年會放一點時間在音樂上面。」眼見這幾年多了一班年青歌手又唱得，又作得，他表示希望有機會與同公司的MC張天賦和陳蕾合作。
自問唔會太寵個女
與太太張馨月育有一女「格格」的林峯被台長程凱欣問及對於女兒學習態度，林峯說：「我唔會太寵個女，讀萬卷書不如行萬理路。希望趁呢個年紀要俾佢知規矩，人生最緊要開心，基本知識要知就可以，其他由女兒自由發揮。」
更多精彩訪問內容，請大家留意2月15日（周四）新城廣播知訊台《原來生活好快樂》足本訪問啦！